Assam leh Meghalaya-ah ruah sur nasa vangin leimin leh tuilian tam

0
318
views

Ruah sur nasa avangin Assam hmun hrang hrangah tui a lian nasa leh tawh hle a, district hrang hrang panga-ah mi 78,000 vel a nghawng tawh tih state sorkar-in a sawi. Disaster Management Authority sawi danin, tui lian hian ram acre 306-a zau a chim tawh a, ran vulh lai, 16,000 vel a nghawng buai a, Goalpara dist. chu tui lian tuar nasa ber a ni. Tuilian hian he dist.-a khaw 86 vel a chim tawh a, mi 41,000 velin an chenna an chhuahsan tawh bawk. Golaghat-a Dhansiri lui pawh hlauhawm chin chhinchhiahna chung lama a luan tawh avangin hmun him zawka insaseng turin mipui an hriattir tawh a, Goalpara a\ang hian mi 30 an chhanchhuah tawh b^kah hmun hrang hrangah relief camp 18 din a ni tawh bawk.
Meghalaya-ah pawh hmun hrang hrangah tuilian leh lei min a tam hle a, Assam leh Meghalaya thlun zawmtu, National Highway 51 chu lei minin a hnawh nual bakah, tui kawngah a chang titih niin thuneitute chuan an sawi a, North Garo Hills-a Bajengdoba-ah relief camp 4 din a ni tawh a, khaw pariat vel chu tuiin a chim tawh niin an sawi bawk. West Garo Hills District Bawrhsap, Pravin Bakshi chuan tuilian hian lei a tichhe hnem hle tih a sawi a, Tura kawngpui pawh lirthei kal hleih theih loh khawpin tuiin a chim a, a theih ang angin chhawmdawlna thil chi hrang hrang sem tur an buatsaih nghal tih a sawi.