Australia High Court-in mahni anpuite neih chungchanga mipui vote lakna tur khin letna thubuai ngaihtuah tan

0
462
views

Australia rama court sang berin mahni anpuite neih chungchanga mipui vote lakna tur khin letna thubuai a ngaihtuah tan ta a, sorkar chuan mahni anpui neih chungchangah hian kar leh atangin mipui ngaihdan lak a tum a ni. Mipui ngaihdan lo lang chu sorkarin a zawm ngei ngei dawn tihna phei chu a ni lo nia hriat a ni a, mipui mar deh nan leh, an duh dan hriat nan sorkarin hei hi buatsaih a tum a ni. PM, Malcolm Turnbull chuan mipui ngaihdan hian kum tawp lama hemi chungchang, Parliament-a put luh tur pawha nghawng thei dawn niin a sawi a, mahni anpui neih tantute leh eptuten tan la nasa hle mah se, court-in a remtih loh chuan mipui ngaihdan lak tumna hi thulh a ni ang. Hemi chungchangah hian Australia High Court-ah hian thu pahnih a lut a, vawiin leh naktuka ngaihtuah atana tih a ni. Dan hre mite chuan, heng thu lutte hi chin fel thuai a ngai dawn tih sawiin, sorkarin mipui ngaihdan lakna tur lehkha hi tun thla ni 12 atanga thawn chhuah a tum avangin, tihkhawtlai theih a ni lo tih an sawi. Mipui ngaihdan lakna atan hian sorkarin Australian dollar mtd. 122 vel a seng dawn nia hriat a ni a, a dodaltute chuan, hemi atana senso tur hi dan anga Parliament-a pass a nih loh avangin sum hman tum dan hi a dik lo niin an sawi.