Bangladesh-ah Rohingya Muslim 18,500 vel tlanchhe tawh

0
774
views

Myanmar rama Rakhine state-a Rohingya hel pawlte leh sorkar sipaite inakara buaina a chhuah thar leh hnuah, Rohingya Muslim 18,500 vel chu Bangladesh-ah an tlanchhe tawh niin khawvela raltlan chungchang buaipuitu pawl, International Organization for Migration chuan a sawi a, he pawl thupuangtu, Chris Lom-a chuan buaina chhuak thar leh avanga Bangladesh-a tlanchhia, Rohingya raltlan zat chiah hi hriat theih a la ni lo tih sawiin, mi 18,500 velin Bangladesh an lut tawh nia an rin thu leh ramri-ah mi engemaw zat an la awm nia an hriat thu a sawi. Rakhine-a buaina chhuak fo avang hian Bangladesh-ah hian Rohingya raltlan 4,00,000 vel an awm mek a, hei vang hian Bangladesh sorkar chuan raltlante hi luh belhtir a tum tawh loh thu leh luh tumte chu thawn let an nih tur thu a lo sawi tawh a ni. Puan tawh angin, ni 6 liam ta khan Rohingya hel pawlte hian police leh sipai hmun 20 chuang an bei a, he inbeihna thlengah hian mi 110 vel an thi a ni.