Barcelona-a mi 13 chil hlumtu nia rinhlelh zawng mek

0
365
views

Spain rama Catalonia bial khawpui, Barcelona-a Van hmanga mi 13 chil hlumtu nia rinhlelh, Morocco rama piang, kum 22 mi, Younes Abouyaaqoub-a chu police-te’n an zawng mek. Police-te chuan Abouyaqoub-a hi a la dam an rin bakah, a la tlanchhe mek a nih an ring a, pawi khawih nana hman, Van khalhtu nia rinhlelh hmasak, kum 17 mi, Moussa Oukabir-a chu Barcelona thlang lama khaw pakhat, Cambrils-a motor hmanga pawi khawihna dang a thlen hnua police-in an kah hlum zingah khan a tel ni a hriat a ni. Abouyaaqoub-a hi Barcelona hmar lama Ripoll khuaa cheng a ni a, Ripoll-ah hian mi pathum man an ni tawh a, Barcelona chhim lam atanga km 200 vela hlaa awm, Alcanar khuaah mi pakhat man a ni bawk a, puan tawh angin, Nilai zan khan chenna in pakhatah bomb a puak a, mi pakhat a thi a, mi dang paruk an hliam bawk a ni. Police-te sawi danin, Alcanar-a thil puah hnu-ah khan Barcelona leh Cambrils-a pawi khawihtute hian bomb siamna tur an neih tawh loh avangin motor hmangin an che zui ta nia rin a ni.