Bihar-ah mi 20,00,000 velin tui lian tuar, mi 10 vel thi tawh

0
374
views

Bihar-ah pawh mi 20,00,000 velin tui lian an tuar mek a, mi sang eng emaw zat chu an chenna in atanga sawn chhuah an ni tawh a, mi 10 vel an thi tawh nia hriat a ni. State Disaster Management dept. chuan ruah hi a la han mai dawn loh avangin phai zawl leh hmun hniam lama awmte chu hmun him zawka insaseng tura chahin, hmun sang lam pan turin a hrilh a ni. Bihar CM, Nitish Kumar-a chuan tui lian tuarte chhanchhuah leh chhawmdawl kawnga state sorkar pui turin khawmual leh thlawhna sipaite a pun a, National Disaster Response Force company 10 thawn belh turin thuneitute a ngen bakah PM, Narendra Modi-a leh Union Home Minister, Rajnath Singh-a puihna a dil bawk a, sorkar laipuiin a pui ngei dawn niin CM hian a sawi. Sorkar hotute sawi danin, tui lian hian thlai, cheng vaibelchhe eng emaw zat hu a tihchhiat bakah, kawng pui tam tak a tichhe bawk a ni. Kuminah hian state 20-in tuilian an tuar a, mi 600 chuang an thi a, ran 24,811 a thi bawk a, in 63,215 leh thlai, ram hectare 2,80,000 a mi a chhe tawh bawk nia chhut a ni.