Blue Whale Game vangin Lucknow-ah mipa naupang kum 13 mi inawkhlum

0
454
views

Internet kaltlanga khelh thin, mahni intihlum tura mi fuih thin, Blue Whale Game vangin Lucknow-ah mipa naupang kum 13 mi a inawkhlum. Police-te chuan thi hi Parth Singh a nih thu leh chawlhni zan khan a pindanah inawkhluma an hmuh thu leh, Blue Whale Game a khelhna, a pa phone pawh a lo keng tih an sawi a ni. Parth Singh-a chhungte chuan Blue Whale Game hi ni eng emaw chen chu a khel tawh tih an sawi a, an chenna, Maudaha bial hruaitu, Abhishek Yadav chuan a thil khelh vanga mahni intihlum ni ngeia an hriat thu leh chhui chian mek a nih thu a sawi bawk. Blue Whale Game hi Russia atanga lo chhuak nia hriat a ni a, a kheltute chu thil chi hrang hrang tih tir thin niin, a tawpah mahni intihlum tura tih an ni thin a, khawvel hmun hrang hrangah he game khelh vanga intihlum nia sawi hriat tur a tam tawh hle a, tun \um ami pawh hi India ramchhunga he game khelh vanga intihlum nia sawi pathumna a ni tawh a, August ni 1 khan Mumbai-ah mipa kum 14 mi chu an chenna inchhawng sang atangin a lo zuang thla tawh a, tunhnai lawk pawh khan West Bengal-a pawl sawm zirlai pakhat chu plastic ip hmangin a lo in rek hlum tawh bawk a ni. Delhi High Court chuan Google leh Facebook company te hnenah Blue Whale Game thehdarhna lam chi reng reng paih turin a lo ngen tawh bawk a ni.