Brazil-in dan leh thupek kengkawh turin sipai ruai

Rio de Janeiro-a misual pawlte chetna nasa zelah Brazil sorkar chuan dan leh thupek kenkawh hna thawk turin sipaite a ruai. President Michel Temer chuan hetianga misual pawlte chetna thleng tam zel hi Cancer natna nen a tehkhin a, Misual pawl intelkhawmte hian engkim an thuhnuaiah an dah ti tih tawh tih a sawi. Kum tina neih thin Carnival-ah tharum thawhna a thlen avangin Rio Governor chuan dan leh thupek kenkawh kawnga tanpui turin sipaite a ngen a, sipaite chuan Police te leh venhim hna thawktu dangte hnathawh dan an vil tawh dawn a ni. Sipai aiawha dan leh thupek kenkawh dan viltu tur hi Gen. Walter Souza Braga Netto a ni a, ani hi Eastern Military Command hotupa a ni a, kum 2016 Rio Olympic Games-a venhim hna thawh dan tur a ruahman dan fel tak avanga mi hmingtha tak a ni. Sipai te ruai tura ruahmanna a nemnghah pahin President Michel Temer chuan thil awmdanin a ur-thluk ngang avangin hetiang ruahmanna hi siam lo thei a ni ta lo tih a sawi a, Sorkar chuan tharum thlawhna thleng thin ti reh turin a tul apiang a ti dawn a ni a ti. Rio Carnival-ah hian tharum thawhna thlengin silaia inkahna leh inrawkna a thlen nasa a, Police officer pathum laiin an thih phah a ni.