Chhattisgarh Minister video thlalak nei nia insawi vangin state Congress President police ten man

Chhattisgarh Minister, Rajesh Munat-a dilna angin, Police-ten state Congress President, Bhupesh Baghel chu an man. Pu Baghel hian Munat-a’n hmeichhia a khawsakpui lai video thlalak a nei niin a sawi a, Munat chuan amah vau nan hei hi a hmang nia police-te a hriattir hnuah, man a ni ta a ni. Pu Munat-a video thlalak nei nia insawi, BBC Journalist hlui, Editors Guild of India member, Vinod Verma pawh nimin khan man a lo ni tawh a, Chhattisgarh sorkar chuan Verma leh Munat te hi inthurualin BJP kaihhruai sorkar chu tihhmingchhiat an tum niin an sawi a, Congress party hotute erawh chuan, BJP hian Munat-a hum tumin chanchinbumi an bei niin an puh ve thung a ni. Police-te chuan Verma chenna in an dapna-ah CD tam tham tak, laptop leh pendrive an man a, a chhunga thil awmte pawh puanzar an tum thu an sawi. Verma hi sorkar leh thuneitute dangten chanchinbumite vau beh an tum dan chhuitu pawlah te pawh a lo tel tawh \hin a, Munat-a video thlalak a neih avang hian Chhattisgarh sorkar chuan a ngai thei lo tih nimin khan chanchinbu mite a lo hrilh tawh a ni.