Chhun lama condom fakna TV-a chhuah sorkar laipuiin khap

Sorkar laipuiin Television-a condom fakna, chhun lama tihchhuah a khap. He khapna thupek hi nimin khan chhuah a ni a, TV channel-te chu zing dar 6 atanga zan dar 10 thleng, condom zawrhna leh sawi mawina lam chi tichhuak tawh lo tura a hriattir rualin, a bik takin naupang tan a tha lo a, hman sual theih a ni bawk niin a sawi. Information and Broadcasting Ministry thupekah chuan, TV channel thenkhatah condom fakna hi uar taka tihchhuah a ni tih tarlan a ni a, hei hi naupang hmuh atana thil tha lo-ah Minister chuan a ngaih avangin Cable Television Networks Rules, 1994 tlawh chhanin hetiang hi tichhuak tawh lo turin a hriattir a, an duh chuan zan dar 10 leh zing dar 6 inkarah tihchhuah theih a nih thu a sawi bawk. Pawl pakhat, Advertising Standards Council of India (ASCI) chuan tun htla tir lamah khan condom fakna chhuah fo titawp tur emaw, a chhuah hun bithliah tur emaw hian sorkar a lo ngen tawh a, September thla khan condom fakna atana Sunny Leone an hmanna chu he pawl hian a ngaimawh hle a, he fakna hi Gujarat-a Surat khawpuia hmun tam takah tar a ni bawk a, he khawpuia Hindu Yuva Vahini pawl pawhin an tarna hmun pakhatah lungawi lohna an lantir nghe nghe a ni.