Thawhtanni khan Schellenberg-a chu ruihhlo methamphetamine kg 222 tawlh ru-a puhin China Court chuan thiam loh chantirin thi turin a chungthu a rel a, Canada Prime Minister Justin Trudeau chuan dan mumal lo taka thil kalpuiah China chu a puh a ni.
Vancouver-a China Executive, Huawei financial officer Meng Wanzhou-a man a nih hnua, Schellenberg-a leh Canada mi pahnih Beijing-a hren an nih chungchangah Trudeau chuan khawvel ram hruaitu dangte inrawlh tura a duh thu a sawi a, China-in a hren mekte zinga pakhat hi Beijing-a Canada Embassy a diplomat chawlh la mek, Michael Kovrig a ni.
China-a Canada Ambassador John McCallum-a sawidan chuan Canada mite pahnih hi Police te chuan nitin darkar 4 zawhna an zawt \hin a, danhremi rawih pawh phalsak an ni lo a ni.
Trudeau chuan Kovrig-a hi ram palai a nihna anga humhimna bik a neih pawh zahsak lovah China chu puhin Canada chu a lungawi lo hle tih a sawi.
Canada Foreign Minister Chrystia Freeland chuan European Union pawhin Canada a thlawp tih a sawi a, China Foreign Ministry thupuangtu Hua Chunying erawh chuan Canada thlawptute chu chhiar tham lek an ni a ti thung a, an ngaihdan thlak an tum lo tih a sawi bawk. Canada Ambassador John McCallum chuan ram pahnih inkar buaina hi chinfel mai a nih a rin loh thu sawiin, ram dangte tanpuina a ngen a, China ram hruaitu hlunte pun a, an thil tih chuan China hmel a ti hem a ni tih hriattir an ngai a ni a ti.
