CJI Justice JS Khehar thlahna inkhawm Supreme Court kawt zawlah buatsaih

0
649
views

Chief Justice of India, Justice JS Khehar-a chu pension-a a chhuah ve dawn tak avangin vawiin khan Supreme Court kawt zawlah amah thlahna inkhawm buatsaih a ni a, kum 65 a tlin tawh dawn avangin naktukah a pension dawn a ni. Chief Justice thar atan Justice Dipak Misra-a chu kar leh Thawhtanni khian President Ram Nath Kovind-a’n a la lut ang, Justice Khehar-a hian a thuchahah, amah hmangaiha, enkawl sei liantu leh englai pawha ngaihtuah em em rengtu, a nu, kum 95 mi hnenah lawmthu a sawi a, a pian leh murna ram, Kenya ram chungah pawh a lawm thu leh, dinhmun sang tak, Chief Justice hial a luah theihna, India ram hnenah pawh lawmthu sawiin, India ram laka a bat chu rulh sen loh niin a sawi. Punjab University atanga zir chhuak, Pu Khehar-a hi Karnataka leh Uttarakhand High Court Chief Justice pawh a lo ni tawh a, kum 2011 khan SC Judge atana ruat a nih hnuah, kumin January ni 4 khan Chief Justice a ni tan a, sulhnu lian tak tak a neihte zingah, a kaihhruai bench chuan Muslim mipate’n an nupuite, chawp leh chilha an then mai theihna, triple talaq an tih chu a hnawl bakah, mimal thil humhalhna, right to privacy chu ram mipuite dikna leh chanvo a ni tih a puang a ni.