Congress-in MLA 44 Gujarat-ah khung khawm

0
578
views

Bengaluru khawpuia Eagleton Golf Resort-a ni kaw chhung khung khawm an nih hnuah, Congress MLA 44-te chu Gujarat-ah an let leh tawh a, amaherawhchu vawiin khan hmun danga khung khawm leh nghal an ni. Congress MLA-te hi tukin zing dar 4:45 khan Ahmedabad khawpuia tumhmun, Sardar Patel International Airport-ah tumin, Gujarat Congress President, Bharatsinh Solanki-a leh party hruaitu dangin an lo dawngsawng a, hemi hnu hian party hruaitute hian Anand district-a Borsad khawpui bula chawlhna in pakhat, Neejanand resort-ah hruaiin, helai hmunah hian an khung khawm leh nghal a ni. Puan tawh angin, thla hmasa khan Congress MLA parukin an party chhuahsanin, BJP an zawm a, Congress chuan party chhuahsan tumte khuah khirh nan Bengaluru-a Eagleton Golf Resort-ah MLA 44 a khungkhawm a, an MLA-te buaipui tur hian Congress chuan Karnataka Energy Minister, DK Shivakumar a ruat a ni. Congress chuan a party MLA-te hi Gujarat-a rorel lai party, BJP-in a vau reng avang leh, party phatsana BJP an thlawp theih nan cheng 15,00,00,000 pek tuma an thlem thin vangin thawn bo an ngai niin a sawi a ni. Naktuk hian Rajya Sabha inthlan neih a nih dawn vangin Congress hi an fimkhur lehzual ni a sawi a ni a, Gujarat hian Rajya Sabha-ah seat thum a nei a, seat pahnih hi chu BJP President, Amit Shah leh Union Minister Smriti Irani-te’n la dawn tih chiang mahse, seat dang pakhatah hian party President, Sonia Gandhi-i tha chhangdawltu, Rajya Sabha MP ni lai, Ahmed Patel-a chu tlin nawn tir an tum hle ni a sawi a ni.