Congress President atan Rahul Gandhi dah fel tum

Congress President atan Rahul Gandhi chu thla leh chhung khian dah fel tum nia hriat a ni a, October ni 31-a an party inthlanna zawh fel a nih hmain, hei hi tihfel tum a ni. Congress Central Election Authority chuan state tina an party inthlanna buaipuitu, Pradesh Returning officer-te chu thla leh ni 3-ah New Delhi-a kal khawm turin a ko a, hetah hian October ni 10 hi PCC leh AICC member thlan fel hun atan ruat a ni ang a, PCC leh AICC member-te hi ram puma an party President leh, Congress Working Committee thlangtu tur an ni ang. A thlangtu turte hi tihfel a nih hunah Congress Working Committee-in party hruaitu tur thlan hun hi an ruat fel dawn a ni. Tuna an President, Sonia Gandhi-i’n hemi hma hian state hrang hranga an party hruaitute kawmin thil pawimawhte a sawipui hmasa ang a, Congress Central Election Authority hian Pradesh Returning Officer-te hi tun thla chhung ngeia District Congress Committee inthlanna tifel hman turin a hriattir nia thu dawn a ni.