European Union-in online-a rorel inkhawm a buatsaihah ram 40 velin coronavirus vaccine leh coronavirus do zelna atan sum thawh an remti a, European Union Commission President, Ursula von der Leyen chuan ram 40 velin sum an thawh tur hi khawvela la awm ngai lo, khawvel pum huapa hri leng do kawnga thawh hona bul \anna a ni dawn tih a sawi.
Ursula chuan an hmalak tumna hian \anrualna leh mihring ngilneihna hlut zia a lantir tih a sawi a, tuna sum tlingkhawm aia tam hi hun lo kal zel turah an la mamawh dawn chauh tih a sawi bawk.
Khawvela ram hrang hrang 40 te bakah hian UN te, philanthropic body te leh research institute te pawhin sum an thawh bawk a, mimal sum thawh tumte zingah zaithiam Madonna pawh a tel a, US dollar nuai 11 thawh a intiam a ni.
European Commission leh Norway chuan US dollar tluklehdingawn 1 vaccine siam nan a thawh a, France chuan Euro maktaduai 500 thawhin, Saudi Arabia leh Germany pawhin sum tam tham tak thawh an intiam bawk a, hetihlai hian Japan chuan US dollar maktaduai 800 thawh a intiam bawk a ni.
Coronavirus umbona tura hmalaknaah hian Russia leh US an tel ve lo va, China chuan a aiawh palai EU inkhawm buatsaihah hian a tir a ni.
EU chuan sum tlingkhawm zinga US dollar tluklehdingawn 4.4 chu vaccine siam chhuah nan dah a ni ang a, dollar tluklehdingawn 2 chu damlote enkawl nan, dollar tluklehdingawn 1.6 chu hri kai leh kai lo enfiah nan dah a ni ang a ti.
UK Prime Minister, Boris Johnson chuan thiamna leh theihnate khawvel ram hrang hrangten an thawhkhawma, an \anrual \hat poh leh vaccine siamtu scientist te chuan an hnathawhnaah hlawhtlinna an hmu hma ang tih a sawi a ni.
