Dalai Lama’n India leh China inkar Buddhism hmanga siam that theih inbeisei

0
719
views

Tibet-a Buddhist sakhaw hruaitu lu, Dalai Lama chuan ramri avanga buai mek, India leh China chu indo pawh ni se, chak zawk an awm thei dawn lo niin a sawi. India, China leh Bhutan inkara awm, Doklam chungchanga ram pahnih buaina hian ziaawm lam a la pan theih loh avangin mi thenkhat chuan indona a chhuah mai an ring a, kar hmasa khan sorkar laipui chuan China sipaite laka ramri hum turin Sikkim leh Arunachal Pradesh-ah sipai a thawn belh a, sipaite hi inralring tura hriattir an ni. Kum 82 mi, Dalai Lama hian China chu sipai ngah leh ralthuam nei tha zawk ni mah se, mi tld. 10 vel awmna ram, India hi thiltithei leh chak tak a nih thu a sawi a, hei vang hian ram pahnihte hi an indo pawhin a tawpah chuan inremna siam a ngai dawn tho tho dawn nia sawiin, hemi atan hian ruahmanna tha tak a neih thu a sawi a ni. Dalai Lama chuan, China hi khawvela Buddhist tam berna ram a ni, a ti a, India rama hmuh chhuah, Buddhism zirtirna chu mi tam zawkin an zui avangin hemi hmang hian ram pahnih inkar boruak hi a siam that theih a beiseiawm niin a sawi a, hemi chungchang hi India sorkar thuneitute pawh a hrilh tawh nia sawiin, China Buddhist-te’n India tlawh duhna rilru an put theih dan tur ruahman fel a nih chuan, China mipuite’n India an hmuh dan pawh a danglam thei hle dawn niin a sawi.