Gorkhaland state thar siam din phut avanga ni 92 lai total bandh huaihawt a nih hnuah, Darjeeling-ah khawsak phung a pangngai leh \an nia hriat a ni a, sorkar hotute chuan Darjeeling leh Siliguri inkarah bus eng emaw zat, ven himna hnuaiah kal tir a nih thu an sawi. Sorkar enkawl zirna inte pawh hawn a nih bakah, zirtirtute pawh an hna zawm leh tawh tura ngen an ni a, hmun hrang hrangah dawr hawng tur leh khawsak phung pangngai chhunzawm leh tura ngenna pawh police-te leh sorkar thuneitute’n an tichhuak reng a, Gorkha Janmukti Morcha hruaitu ban tak, Binay Tamang pawhin khawsak phung a pangngai sawt hle niin a sawi. Puan tawh angin total bandh titawp tur hian state CM, Mamata Banerjee chuan Gorkha Janmukti Morcha chu vawi tam tak a lo ngen tawh a, a ngenna te hi GJM hotupa, Bimal Gurung chuan an pawm loh thu a lo sawi tawh \hin a, an pawl leh state sorkar leh sorkar laipui aiawhte telma inbiakna buatsaih thuai a nih loh chuan, boruak a chhe zual dawn nia a sawi bakah, thil duhawm lo thleng a awm a nih pawhin, state sorkar mawh a nih tur thu a sawi bawk a ni.
Tunah pawh hian Bimal Gurung-a chuan an pawlte chu khauh zawnga bandh chhunzawm zel turin a hrilh a, amah hi man tura zawn a nih avangin a awmna chin hriat a ni lo. Darjeeling leh a chhehvelah hian June ni 18 a\ang khan Internet service pawh tihtawp a ni tawh a ni.
