Delhi sorkarin thutlukna a siam kawngah Lt Governor remtihna a lak vek kher a \ul lo tih Supreme courtin thutlukna a siam hnuah AAP sorkar in thupek a tih chhuah chu sorkar hnathawk lian ten dan kalh tiin an hnawl a, Sorkar chuan court-a kal lehah a vau.
Hnehna ropui tak nia AAP in a ngaih Supreme Court thutlukna puanzar anih hnu lawk hian Delhi-a AAP sorkar-a Dy Chief Minister Manish Sisodia chuan officer te transfer kawnga thuneihna Delhi sorkar kuta dah turin hma a la a, hei hi Services dept chuan dan kalh a ni tiin an hnial a, he thuneihna hi Lt Governor kuta la awm a ni an ti.
Manish Sisodia hian services dept secretary hnenah Chief Minister Arvind Kejriwal kuta officer te transfer theihna thuneihna pe tur hian file a kaltir nghal a, services dept secretary chuan file hi thawn let leh nghalin thuneihna chu Lt Governor kuta awm a ni tiin a ziak let a ni. Sisodia chuan Chief Secretary thil tih dan chu Supreme Court Constitutional Bench rorel zah lohna a ni a ti a, a \ul anga hma la zui turin an danhremite an be rawn nghal tih a sawi. Service Dept in note an ziah letah hian Supreme Court thupek chuan kum 2015 May thlaa Home Ministry in sorkar hnathawk lian zualte transfer tura thuneihna, Lt Governor kuta a dah chu a \hiat lo a ni tih tarlan a ni.
Supreme Court hian Lt Governor chu mahnia thutlukna siam thei a ni lo tih sawiin, ram leilung, police leh dan leh thupek kenkawhna kaihhnawih thih loh thil dangah chuan Delhi sorkar chuan a duh angin ro a rel thei a ni a ti a, AAP chuan sorkar hnathawk lian te transfer thua Lt Governor in thuneihna a neih zui zel chuan Supreme Court rorel a kalh tihna a ni an ti.
