Egypt Sinai-ah mi firfiak pawlten muslim biakin bei, mi 235 vel thi

0
356
views

Egypt-a Sinai bial hmar lama Muslim biak in pakhat chu nimin khan bomb hmanga beih a ni a, mi 235 vel an thi a, mi dang 100 chuang an hliam. He inbeihna hi eng pawl mahin an tihah an la chhal lo na-in, ISIS mi firfiak pawl thlawptute tih nia hriat a ni a, kum 2013 hnu lam a\ang khan helai bialah hian ISIS thlawp mi firfiak pawl hrang hrangten pawi an khawih fo tawh \hin a, nimina thil thleng hi Egypt rama pawi khawihna thleng tawha \um khata thi an tam ber \um a ni. Thuneitute sawi dan chuan Bir al-Abed-a Muslim biak ina pungkhawmte chu an \in dawn laiin bomb hi tihpuah a ni a, tlanchhiat tumte chu silai keng, mi 40 velin hual betin an pawng kah zui a, hliamte \anpui tura tirh, ambulance-te pawh nasa takin an lo kap a ni. Egypt sorkar chuan thi zat hi 235, hliam zat hi 109 niin a chhinchhiah a, thi hi an la pun an rin thu an sawi bawk. He thil thlen hnu lawk hian Egypt sipai-te chuan Sinai bial hmun hrang hrangah indo thlawhna an tir chhuak nghal a, mi firfiakte tawmna leh an lirtheite an bei zui ve nghal a, President Abdel Fattah al-Sisi chuan mi firfiakte chungah hian a na thei ang bera phuba lak tum a nih thu a sawi. Syria leh Iraq rama IS mi firfiak pawl hmunpui lak let a nih hnu khan, mi firfiak engemawzat chu Egypt-ah hian an lut nia hriat a ni a, nikum December pawh khan Coptic Christian-te biak in beihna-ah mi 30 thah an lo ni tawh a, kumin Tumkau ni pawh khan Alexandria khawpui leh Nile luipui dunga Tanta khawpuia Kristian-te chu beih an lo ni tawh bawk a ni.