Khawvawt-in Europe ram thenkhat a tuam avangin ram tam takah khawsak phung pangngai a khaihlak nasa hle. Vur thli tleh leh vur sur nasa lutuk avangin motor kawngpui tam tak khar a ni a, rel tlan tur leh thlawhna service tam tak cancel a ni bawk a, zirna in tam tak khar a ni bawk. Khaw chhe kaihhnawihah hian nunna chan mi 55 an awm tawh a, heng zinga 21 te chu Poland mi an ni. World Health Organisation chuan chenna in nei lo khawlaia khawsa ten an tuar nasa hle thei dawn tih a sawi a, a bikin kum upa lam leh naupang te bakah natna benvawn nei te an ngaihtuahawm zual tih WHO chuan a sawi. Ireland chu a tuar nasa pawl a ni a, thlipui emma a tleh tel avangin kum 10 kalta chhunga vur sur nasat ber tum an hmachhawn mek a, Dublin Tumhmun atanga thlawhna thlawk chhuak leh tum tur te pawh cancel a ni. Switzerland Geneva Tumhmun pawh nimin khan khar a ni a, vur thenfai a nih hnuah hawn leh a ni tawh thung. France ah pawh Montpellier khawpui bulah lirthei 2,000 zet an tangkhang a, an zinga tam tak chuan darkar 24 aia rei an tang tawh tih an sawi a, Amsterdam Schiphol Tumhmun ah pawh thlawhna service tam tak cancel a ni bawk. Europe ram tam zawkah ni hnih thum hnuah chuan khaw awmdan hi kang deuh tura beisei a nih laiin, Ireland leh England chhim lam te erawh khawvawtin a la tuam chhunzawm rih dawn tih khawchin zirmite chuan an sawi.
England ah chuan hmun tam takah vur sur nasa avanga motor kawngpuia tangkhang mek, lirtheite chhan chhuak turin sipai te tirh an ni a. Rel-a zin mek mi sang tel zet chu khawvawt hnuaiah hian an tangkhang bawk a, Hamsphire leh hmun dang thenkhatah vur thli na taka a tleh avangin motor kawngpui tam tak a ping a ni. Hmun thenkhataah chuan ni 4 chhung lai khawsak phung pangngai a khaihlak tawh a. Police te chuan tul tawpah lo chuan zin chhuak rih lo turin mipuite an chah a ni.
