France a\anga Rafale indo thlawhna lei chungchang thubuai thar thehluh a ni a, Nilaini hian Supreme Court-in a ngaihtuah nghal dawn.

0
305
views

 

Thubuai hi ukil Vineet Dhanda thehluh a ni a, Rafale inremna kimchang leh UPA an sorkar lai nena Rafale indo thlawhna man khaikhinna Court sang bera thehlut turin a ngen a, Reliance leh Dassault Company-te inremna chungchang pawh hailan a dil bawk a ni. He inremna chungchanga ML Sharma-a’n thubuai a lo thehluh tawh pawh Nilaini vek hian ngaihtuah a ni dawn a, Sharma chuan he inremna-ah hian eirukna thil a tel avang leh ram danpui Article 253-naa Parliament-in ramdang sorkar nena indawr tura dan a siam chawp theih zulzuia kalpui a nih loh avangin sut leh a dil a ni.

Puan tawh angin Indian Air Force chuan kum 2007 August thla khan indo thlawhna 126 lei belhna tur tender a chhuah a, hei hi ram hrang hrang company-te hnenah pek a ni a, France ram company Dassault Aviation siam Rafale indo thlawhna 36 leina tur inremna sorkar pahnihte hian an ziak a, Congress hruaitu Tehseen S Poonawalla pawhin ralthuam lei chungchanga ram kalphung, Defence Procurement Procedure-in a phut anga Union Cabinet pawh rawn hmasa lova sorkar laipuiin thutlukna a siam tiin Supreme Court-ah hian March thla khan thu a lo thlen tawh bawk a ni.