French Police Officer, misualin silai nena mi a hren chhanchhuah tum thi

French Police Officer, misualin silai nena mi a hren chhanchhuak tura amah leh amah inbarhlut chu a hliam tuar lovin a thi. Kum 45 mi, Lt Col Arnaud Beltrame hi pasal\ha ropui tak leh chhuanawm tak a ni tiin French President Emmanuel Macron chuan a sawi. He sipai huaisen hian French chhim lama inkahna thlengah a nun hlanin midang a chhanchhuak a, Islam sakhaw la vungtu pakhat, kum 25 mi Dedouane Lakdim chuan silai nen mi hrengin mi 3 laiin an thih phah a, amah pawh hi police ten an kaphlum ve nghal a ni. Interior Minister Gerard Collomb chuan Lt Col Arnaud hian ram tan a nun a hlan a, france chuan a huaisenna hi a theihnghilh ngai tawh dawn lo a ni a ti. In kahna ah hian mi 16 lai an hliam a, Macron chuan he thil thleng hi firfiaka chetna a ni a ti. Lakdim hian Salah Abdeslam chhuah tir a phut a, Salah Abdeslam hi kum 2015 november ni 13-a Paris beih anih \um, mi 130 zetin an thih phahnaah khan a mawhphurtu ber zinga mi nia hriat a ni. Lakdim thurualpuitu nia hriat a \hian hnai tak pakhat chu Police ten an man nghal a ni. Nimin tuk khan Carcassonne ah Lakdim hian Car pakhat chu silai nena vau betin a chhunga chuang mi pakhat a kaphlum a, Police te kap zuiin an zinga pakhat a kap hliam a, a piah khaw pakhata sumdawnna hmun pakhat chu luhchilhin thil lei mektu pakhat leh dawra hnathawktu pakhat a kaphlum leh a, Police ten an hual beh hnuah hmeichhe pakhat chu inphen nan a hmang a, hetah hian Lt Col Arnaud hian hmeichhe aiah amah chu inpein pawn lama awm Police ten thil awmdan an lo hriat theihna turin a mobile phone chu dawhkanah a hnutchhiah a, silai ri an hriat tak avangin Police te chuan luhchilhin misual hi an kaphlum nghal a, Lt Col Arnaud pawh hi na taka kahhliam a ni.