Germany-a damdawi inah nurse-in mi 90 vel that

0
462
views

Germany-a Bremen khawpui bula damdawi in pakhata damlo 2 a thah vanga kum hnih liamtaa lung ina khung, mipa nurse, kum 40 mi, Niels Hoegel-a chuan damlo 90 vel a that tih an hmuchhuak niin police-te chuan an sawi. Delmenhorst damdawi ina thawk, Hoegel-a hi kum 2015, February thla khan tual thah thubuaiah thiam loh chantir a ni a, Hoegel-a hian damdawi hmangin damlote hi a chiu hlum thin ni a hriat a ni a, police-te sawi danin, kum 1995 leh kum 2005 inkar chhunga Hoegel-a lo thawh tawhna damdawi in pahnihah damlo thi an tam fal hle tih hmuhchhuah a ni a, forensic mithiamte’n heng damdawi ina thite ruang an endiknaah an thih dan a inang tlangpui tih an hmuchhuak bawk a ni. Police-te chuan he thil hi Indopui Pahnihna hnu lama Germany-a thil thleng tawh zawng zawng zinga la rapthlak ber niin an sawi a, Hoegel-a hian damlote hi an lungphu ti tawp thei chi, damdawi hmangin a chiu thin ni a sawiin, damlote hi an lungphu tawp mah se, an la thih chiah loh avangin, a ti dam leh thin niin a sawi a, thi tawh tura ngaih an nih thin avangin a thil tih avang hian a thawhpuite’n an ngaihsan phah hle niin a sawi a ni.