Guatemala tlangkang rapthlak tak avanga nunna chan tam tak an awm avangin an rama eptu pawlte chuan rikrum thila chhanchhuah hna thawktu Emergency response agency hotupa chu ban tir an phut a, Conred-a hian Fuego tlangkang a thlen dawnin inthiar filhlim turin mipuite thurawn a pe lo niin an sawi. Opposition hruaitu hlun Mario Taracena chuan he chhiatna thlengah hian emergency response agency hotute zingah an tih tur ti lo an awm em tih leh inthlahdah an awm em tih chhuichiang turin sorkar an phut tih a sawi.
Tun thlengin Guatemala Fuego tlangkang avanga thi zat finfiah chu mi 99 an tling tawh a, mi tam tak chin hriat lovin an la awm bawk a ni. Pathianni-a tlangkang rapthlak tak hian tlang panga thingtlang khua te chu a chhilh a, Pathianni bakah hian a hnu lamah pawh nasa lutuk lova tlangkang hi a thlen nawn leh avangin chhanchhuah hna thawh pawh a kaltluang thei lo a ni. Tlangkang avang hian mi maktaduai 1 leh nuai 7 vel zetin buaina an tawk a, mi 12,000 vel zet chu hmun him lama sawn chhuah an nih bakah mi 3000 chuang chu an chenna tur hmun buatsaih lailawkah chen tir an ni.
