Gurmeet Ram Rahim Singh-a kaihhruai pawl hmunpui dap

0
650
views

Court thupek angin Haryana-a Sirsa khuaa Gurmeet Ram Rahim Singh-a kaihhruai, sakhaw pawl pakhat, Dera Sacha Sauda hmunpui chu vawiin khan district thuneitute leh sipaite’n an dap leh a, helai hmunah hian puak thei thil siam chhuahna hmun leh hmeichhe hostel hmuh chhuah a ni a, puak thei thil siamna hmun hi forensic mi thiamten an endik nghal a ni. Sorkar thupuangtu, Satish Mishra chuan puak thei thil siamna hmunah hian bomb lam chi, bawm 85 vel hmuh a ni tih leh helai hmun hi phalna nei lova din a nih thu a sawi a, DSS hruaitute chuan halpuah leh halmawi siamna hmun niin an sawi a, he pawl hmunpui chhungah hian lei verh pahnih hmuh chhuah a ni bawk a, hei hian Ram Rahim-a awmna thin leh hmeichhe hostel a pawh bakah, rikrum thila tlan chhuahna tur ni awm tak kawng a pawh bawk a ni. Puan tawh angin, nimin tuk khan sorkar thuneitu, police leh sipai engemaw zatin he pawl hmunpui hi luhkhungin an dap a, helai hmun hi ram acre 600 a zau leh acre 100-a zau a ni a, a chhungah hian an hotupa, nuamsa taka a awmna hmanraw hrang hrangte, damdawi in, stadium, zirna in, bazar leh thil dang tam tak a awm a, 7-star hotel bakah khawvela building leh hmun mawi leh nuam ber ber – Eiffel Tower, Taj Mahal, Kremlin leh Disney World lemte pawh a awm vek a ni.