Kum 1996-a Haryana-a Sonipat khuaa bomb tihpuah chungchangah Haryana court-in Abdul Karim chu dam chhung lung in tang turin a hrem

0
309
views

Kum 1996-a Haryana-a Sonipat khuaa bomb tihpuah chungchangah Haryana court-in he thila inhnamhnawiha puh, Pakistan rama mi firfiak pawl lian, Lashkar-e-Taiba member leh bomb siam thiam, Abdul Karim, Tunda tia koh chu vawiin khan dam chhung lung in tang turin a hrem a, cheng nuai 1 chawi turin a ti bawk. Kum 1996, December ni 28 khan, Sonipat-a hmun pahnihah bomb tihpuah a ni a, he thil thlengah hian mi 15 vel an hliam a, thi erawh chu an awm lo a ni. Nimin khan Sonipat Additional District and Sessions Judge, Dr Sushil Garg-a court chuan dan ding lai tlawh chhanin Tunda-a hi thiam loh a chantir a, Tunda-a ukil chuan district court thutlukna hi High Court-ah khin an tum thu a sawi. Kum 75 mi, Tunda-a hi kum 2008-a Mumbai khawpuia pawi khawihna hrang hrang thlen hnua Pakistan hnen a\anga India-in mi firfiak 20 hlan chhawn a dil zingah khan a tel a, kum 2013 August thla khan Delhi Police-te’n India leh Nepal inrina bula Banbasa khuaah an man a, Tunda-a hi ram chhunga bomb hmanga pawi khawihna thubuai 40 velah a inhnamhnawiha rinhlelh a ni.