Kum 20 lung in tang tura hrem, Gurmeet Ram Rahim Singh tap bang thei lo

0
349
views

Pawngsual thubuai pahniha thiam loh chantir a nih hnua nimina Special CBI Court Judge, Jagdeep Singh-a’n kum 20 lung in tang tura a hrem, Sikh leh Hindu pawl pakhat, Dera Sacha Sauda hotu, Gurmeet Ram Rahim Singh-a chu a tap bang thei lo ni a sawi a ni a, nimin pawh khan court-ah tap chungin tih sual a neih lo tih sawiin, judge hnenah ngaihdam a dil a, lung in atanga bail-a chhuak, mi pakhatin NDTV a hrilh danin, Ram Rahim-a hian ngai a la awh thei lo a, chaw pawh a ei mang lo a, tumah a be duh lo a ni. Judge-in a chungthu a rel sak zawh khan kum 50 mi, Ram Rahim-a hi a hriselna endik sak nghal a ni a, hemi hnu hian tan ina pindan pakhatah khung niin, amah veng tur hian police officer pahnih dah an ni. Puan tawh angin, kum 2002 khan Ram Rahim-a pawla tel, Dera sadhvi an tih, hmeichhe pakhatin khatih hunlaia PM, Atal Bihari Vajpayee-a hnenah, Ram Rahim-a hian amah leh hmeichhe dang eng emaw zat a pawngsual thin tih hrilhin lehkha a thawn a, he lehkha hi Punjab & Haryana High Court-in a bawhzui hnuah, CBI chu Ram Rahim-a laka mipat hmeichhiatna lam thubuai siamsak tura hriattir a ni a, thubuai hi CBI hian a bawhzui ta zel a ni. Kar hmasa Zirtawpni-a Haryana-a Panchkula-a CBI court-in Ram Rahim-a pawngsual thubuaia thiam loh a chantir a avang khan Punjab, Haryana leh Delhi-ah buaina nasa tak chhuak a, he thil thlengah hian mi 31 an thi a, mi dang 250 vel an hliam a, rel, motor leh thil dang tam tak hal a ni.