Kum 2012 December ni 16-a nula pakhat kum 23 mi pawngsual rawn thubuai, Nirbhaya case tia sawiah pawngsualtute chu khai hlum ngei tur an ni tih Supreme Court in a nemnghet nawn

0
682
views

Kum 2012 December ni 16-a nula pakhat kum 23 mi pawngsual rawn thubuai, Nirbhaya case tia sawiah pawngsualtute chu khai hlum ngei tur an ni tih Supreme Court in a nemnghet nawn.

Pawngsual rawntu thi tura an chungthu lo rel tawh mi 4 zinga pathumte chuan court thutlukna ennawna dam chhung tang tura an chungthu rel zawk turin court hi an ngen a, an ngenna chu Supreme Court hian a hnawl a, khai hlum ngei tur an ni a ti a, pawngsualtute hian hremna nep zawk ngen theihna pakhat chiah an nei ta a, chu chu President hnena zahngaihna dil a ni. Chief Justice Dipak Misra kaihhruai Supreme Court Bench chuan heng pawngsualtu kum 29 mi Mukesh, kum 22 mi Pawan Gupta leh kum 23 mi Vinay Sharma te ngenna hi a ngaihtuah hnuah an chungthu lo rel fel tawh chu ennawn leh a \ulna chhan \ha tawk a awm lo tiin a hnawl a ni. Thi tura a chungthu rel ve tho, pawngsual rawntu zinga mi kum 31-a upa Akshay Kumar chuan a chungthu ngaihtuah nawn tura dilna hi a thehlut ve lo a ni.

Supreme Court chuan nikum May ni 5 khan Trial Court leh Delhi High Court ten heng pawngsual rawntute thi tura an chungthu a lo rel tawh chu a lo nemnghet tawh a, heng miten hremna nep zawk pe tura an ngen lehna chu nikum november thla khan ngaihtuah turin a pawm a, vawiin khan Supreme Court chuan a thutlukna hi puangin khai hlum tur an ni tih hi a nemnghet nawn leh a ni.

Kum 2012 December ni 16-a nula kum 23 mi Bus chhunga pawngsual rawna thah zui thu khan rampum a nghawr chhuak a, pawngsualtute hremna dan dinglai pawh siam \hat zui a ni ta hial a ni. He hmeichhe khawngaihthlak tak hi ni 16 damdawiin-a enkawl anih hnuah a hliam tuar lovin a thi a. Ram mipuite chuan a hming lem phuah sakin Nirbhaya an ti a, hei hi hlauh nei lo tih emaw mihuaisen tihna emaw a ni.