He leiverh hi feet 4,309-a thui a ni a, a chhungah rel kawng leh lift te, tui chhe paihna kawr leh boruak luhna tur ventilation te, electric hrui te a awm a, Mexico khawpui Tijuanna a\anga California-a San Diego thleng a pawh a ni.
Leiverh a\ang hian ruihhlo emaw, thil \ha lo dang emaw engmah man an nei lo niin thuneituten an sawi a, Mexico Sinaloa cartel chu khawvela ruihhlo tawlhrutu pawl lian ber an nih vangin US sorkar chuan an hming hmerhin sawi lo mahse an rinhlelh zingah an tel a ni. Hetihlai hian Sinaloa cartel hotupa, Joaquin El Chap Guzman chu US-a tan in pakhatah a tang mek a ni.
He leiverh hi nikum August thlaa an hmuh chhuah tawh kha a ni a, finfiahna neih belh beisei vangin an hmuhchhuah thu hi an tlangzarh lawk lo a ni.
Mexico thuneituten a luh \anna hi an chhui chhuak a, US hnuchhui thiamten an bawhzui a, US Customs and Border Protection sawi danin a thuk zawng chu feet 70 niin, a san zawng chu feet 5.5 a ni a, feet 2-a zau a ni.
He leiverh chhuahna tur nia hriat chu buara bag leia thun khah za chuang hmangin hnawh pin a ni a, San Diego-a Otay Mesa industrial warehouse bul vel chu a chhuahna lai tur nia rin a ni.
