Muslim hovin Mecca khawpuiah Eid al-Adha hmang ta

0
727
views

Saudi Arabia rama Mecca khawpuiah Muslim hun pawimawh, Eid al-Adha hman a ni ta a, he hun pawimawh, Haj hmang tur hian khawvel hmun hrang hrang atangin Muslim mtd. hnih vel an fuan khawp a ni. Pung khawmte hian khawvar hnu lawkah Mina-a in chhawng sang an pan a, hetah hian lungte an vawm theuh a, he hmun hi Setana’n Zawlnei Ibrahim-a fiah nana biak a tumna hmun niin an ngai a ni. Muslimte chuan Zawlnei Ibrahim-a kha Pathianin a fapa neih chhun, Ismail-a hlan tura thu a pek khan, a rinna fiah a ni a, mahse Ibrahim-a chuan Pathian thu chu zawm a tum tlat a, Pathian chuan a fapa chu a zuahsak leh ta zawk a ni. He thu hi Kristian leh Juda mite chanchinah chuan, Pathianin Abraham-a, a fapa neih chhun, Isaka hlan tura a tihna kha a ni a, Haj ni hnuhnung lam hi Eid al-Adha an tih, inhlanna ruai nen hman a ni a, Muslim miten ran tam tak talhin, a sa chu mi retheite hnenah an sem thin a ni. Haj hunpui ni hnuhnung lam, ni thumah hian a hmuna sawmte chu Mina phairuamah hian puan in lian takah an riak a, Ibrahim-a thlemtu, Setana chu an duh lohzia lantirin lungin an vawm thin a ni. Kum hnih kal taah khan Mina-ah hian hetiang hun an hman laia mipui an inchil buai avangin mi 2,400 an thi a, Saudi Arabia sorkar chuan hetiang hi a thlen tawh loh nan kawngpui a zauh bakah, kawng danga fimkhur lehzual dan tur pawh a ruahman a ni. Kuminah hian Haj-a himna lama hnathawk turin mi nuai khat chuang dah an ni a, Mecca leh a chhehvela ni nga chhung, hajj hman a nih chhungin mipui che vel an enkawl dawn a ni. Pung khawmte hi Thawhtanni thleng khian Mina-ah hian an awm ang a, chumi hnuah chuan Mecca-a hmun thianghlim ber, Kaaba an pan ang.