North Korea nen inbiak theih US-in a la beisei

0
1072
views

US Defence Secretary, James Mattis-a chuan North Korea ram chungchangah America-in inbiakna hmanga boruak tihdaih theih a la beisei reng niin a sawi a, indo chu a rapthlak dawn avang leh, a nghawng a nat dawn em avangin, inbiakrem hram chu America duh dan a la nih thu a sawi. Nimin khan North Korea hian America awp, Guam bul hnaia missile pali kah dan tur a ruahman fel mek niin a lo sawi tawh a, US President, Donald Trump-a pawhin North Korea hian America kut a thlak vaih chuan, a inchhir hle dawn niin a lo sawi tawh bawk a, tun hmaa ram thenkhat dinhmun ang chiahin, America pawi sawi chu a pawi thui hle dawn niin a sawi a ni. Thla hmasa khan North Korea hian missile kap hla thei chi, intercontinental ballistic missile vawi hnih a en chhin avangin boruak a sosang hle a, hemi hnu hian UN-in North Korea hrek belhna tur a siam leh bawk avangin boruak hi a sosang lehzual a ni.

North Korea hian Guam lam hawia missile kah dan tur hi a ruahman fel thuai tur thu a sawi a, Guam hi Pacific tuifinriata thliarkar te tak te, US indo thlawhna engemawzat awmna a ni a, US mi 1,60,000 vel an awm bawk a ni. Mahse US Defence Secretary, James Mattis-a chuan nizan khan California-ah thu sawiin, North Korea ram chungchangah hian inbiakna hmanga boruak tihdaih theih a la beisei reng thu leh, hemi rual hian indo thei tura inpeih erawh chu a hna a nih thu a sawi a, Secretary of State, Rex Tillerson leh UN-a US palai, Nikki Haley-ten tharum thawh loh theih dan tur an dap mek chuan awmzia a nei tan tawh nia a hriat thu a sawi bawk. Hetih lai hian China sorkar chanchinbu nia ngaih, Global Times chuan, North Korea hian America a kap a nih a, America-in phuba a lak chuan China chu a inrawlh loh tur thu a sawi a ni. Australia PM, Malcolm Turnbull chuan North Korea-in United States a beih chuan, Australia chuan North Korea a bei ve nghal dawn tih a sawi tawh bawk a ni.