Nuclear ralthuam dotu leh US-in Nagasaki-a atom bomb a thlak tuma dam chhuak, Sumiteru Taniguchi-a chu kum 88 mi niin a thi

0
530
views

Indopui pahnihna hun laia America-in Japan rama Nagasaki khawpuia atom bomb a thlak tuma dam chhuak, nuclear ralthuam dotu langsar tak, Sumiteru Taniguchi-a chu cancer natna avangin kum 88 mi niin a thi. Kum 1945, August ni 9-a US-in Nagasaki-a atom bomb a thlak khan khatih laia dak ina thawk, Taniguchi-a hi kum 16 mi a ni a, a sawi dan chuan, Nagasaki-a bomb tlakna hmun atanga km hnih vela hlaah thirsakawr a khalh a, bomb puak avang khan nikhaw hre lo-in a tlu nghal a, a harh leh chuan a dar vei lam atanga a kut hmawr thlengin a kang sawr vek tih a hmu a, a hnungzang phei chu a kang nasa hle a, a bul vela mite phei chu an kang hlum deuh vek a ni. Nagasaki-a bomb thlak a nih hnu khan Taniguchi-a hi damdawi inah kum 3 leh a chanve vel a awm a, hemi hnu hian nuclear ralthuam dona kawngah beihpui thlak tanin, Japan leh khawvela ram hrang hrangah thu a sawi thin a, mi thenkhat chuan a hnathawh avang hian khawvela chawimawina sang ber, Nobel Peace Prize dawng tlakah an ngai a ni.