Panchkula-a buaina Honeypreet-in ruahman lawk

0
445
views

Haryana-a sakhaw pawl pakhat, Dera Sacha Sauda hruaitu, Gurmeet Ram Rahim Singh-a, pawngsual thubuaia CBI court-in August ni 25-a thiam loh a chantir hnua Panchkula-a buaina leh tharum thawhna nasa tak thleng kha, Ram Rahim-a fanu leh a tha chhang dawltu, Honeypreet Insan-i’n a hma chawlhkar khat vela a lo ruahman lawk niin Police-te hmaah a puang. Puan tawh angin, Honeypreet-i hi lung in a\anga a pa hruai chhuah tumah leh sorkar laka hel tura mipuite fuih pawrha puh a ni a, hun eng emaw chen a tawm bo hnuah, tun thla ni 4 khan police-ten an man a, Haryana-a Panchkula-a Chandimandir police station-ah thu zawh fiah nghal a ni a, hemi hnu hian police-te kutah ni 6 chhung awm tura tih a ni. India Today sawi danin, Dera hruaitu, Ram Rahim-a hian CBI court-ah thiam chan a beisei avangin court-a a thubuai chin fel a nih hnuah Panchkula-ah hian vantlang inkhawm huaihawt a tum niin Honeypreet-i hian a sawi a, mahse thiam loh a chan tak avangin Dera thlawptu mipuite chuan Panchkula-ah hian buaina an siam a, hei pawh hi an ruahman lawk niin Honeypreet-i hian a sawi. Ram Rahim-a hi thiam loh chantir a nih chuan Dera thlawptute hi buaina siam turin an hrilh lawk niin a sawi a ni.