Rakhine chungchangah thu dik lo a tam – Aung San Suu Kyi

0
710
views

Khawvela chawimawina sang ber, Nobel Peace Prize dawng tawh, Myanmar ram hruaitu leh Foreign Minister, Aung San Suu Kyi-i chuan Rakhine state-a buaina thleng nia sawi chungchangah thu dik lo a tam hle niin a sawi a, Turkey President, Recep Tayyip Erdogan-a nena phone-a an inbiaknaah, Myanmar sorkar-in Rakhine mipuite ven him hna a thawk tan tawh nia sawiin, dikna leh chanvo nei lo-a awm hrehawmzia hre chiangtu an nih angin, sorkar pawhin theihtawp chhuaha ram mipuite dikna leh chanvo humhalh a tum thin niin a sawi. Rakhine-a thil thleng chungchangah hian thu rintlak leh dik tawk lo tak tak a inpawlh nasa hle tih hi mithiamte pawhin an lo sawi tawh thin a, hetih rual hian buaina avanga Mynamar thenawm, Bangladesh-a Rohingya ral tlan tam tak an awm tawh avangin mi tam zawk chuan hemi thlen chhanah hian Myanmar sorkarin mawh a phur niin an ngai a, Rohingya Muslim-te hi Myanmar ram khua leh tui anga ngaih an nih loh vangin hmuhsit leh en hran an ni a, Myanmar rama cheng dangte nen an hmel a inan loh em avang ringawt pawhin hnawk tih an hlawh hle nia sawi a ni bawk.

UN Secretary General, Antonio Guterres-a chuan Myanmar sorkar hnenah Rakhine state-a Rohingya Muslim-te hi ram khua leh tui nihna emaw, dan anga ram chhunga khawsak phalna emaw pe turin a nawr a, Rohingya hel pawl, Arakan Rohingya Salvation Army chet dan chu demawm a tih thu a sawi rualin, Myanmar sipaite chet dan chu dik lo a tih thu leh, hel ho thil tih avanga pawi sawi lovin an tuar phah chu tha a tih loh thu a sawi a ni. Pu Guterres-a hian UN Security Council hnenah a ngaihdan hi ziaka thlenin, tharum thawhna thleng mek tihtawp a nih theih nan tan la nghal turin a chah bawk a ni. Puan tawh angin, Rakhine-a Rohingya hel ho leh Myanmar sipai leh police-te inkara buaina chhuak thar leh avang khan Bangladesh lamah Rohingya Muslim 1,25,000 vel an tlanchhe tawh nia hriat a ni.