RK Nagar by-election-ah AIADMK chak zawh loh vangin party mi 44 hnawtchhuak

AIADMK hruaitu, Pi J Jayalalithaa-i bial \hin, RK Nagar Assembly biala by election-ah rorel lai, AIADMK a chak loh avangin an party mi 44 hnawhchhuah an ni a, hruaitu pahnih pawh an chanvo hlihsak an ni. He bialah hian tun thla ni 21-ah khan vote thlak a ni a, hetah hian AIADMK phel lehlam mi, Sasikala-i laina hnai, TTV Dhinakaran-a chuan amah hnaih bertu, rorel lai pawl candidate, E Madhusudhanan-a chu vote 40,000 chuangin a hneh a, Independent candidate, TTV Dinakaran-a hian vote 89,013 a hmu a, AIADMK candidate, E. Madhusudhanan chuan vote 48,306 a hmu a, DMK candidate, N Maruthu Ganesh-a’n vote 24,651 a hmu thung a, BJP candidate phei chuan NOTA-a vote tla zat pawh a hmu tling lo a ni. AIADMK hruaitu pahnih, state CM, E Palaniswami leh Dy. CM, O. Panneerselvam-a chuan an party mi 44 chu an party a\anga hnawhchhuah an nih thu an puang a, an zingah hian Madurai MLA hlui, R. Samy pawh a tel a, ani hi Dhinakaran-a thlawptu langsar tak a ni. He inthlanna hi thla 20 ding tawh, AIADMK kaihhruai sorkar dinhmun fiahna ang deuha ngaih a ni a, thlan tlin a nih hnuah TTV Dinakaran-a chuan amah chu Pi J Jayalalithaa-i hmun luahtu tur dik tak a ni tih mipuiten an nemnghet ta nia sawiin, sorkar ding lai chu thla thum chhunga paih thlak a tiam a ni.