Sierra Leone leimina thi te sunna hmang tan

0
371
views

Africa khawmualpuia Sierra Leone chuan chirh tawlh rapthlak tak avanga mi 300 chuang an thih avangin vawiin atang khan chawlhkar khat awh tur, mitthi sunna an hmang tan a, thite zingah hian naupang 105 an tel nia hriat a ni. He thil thleng rapthlak takah hian an khawpui, Freetown-ah mi 600 vel an la bo a, President Ernest Bai Koroma chuan an rama thil thleng chu a rapthlak takzet tih sawiin, heng mite sun an nih chhung hian hnam puanzar chu a ngul chanve-ah zar a nih tur thu a puang a, ram dangte chu an mamawh thawna tanpui turin a ngen bawk. Tanpuitu pawlte chuan fur a la nih avangin Sierra Leone-ah hian tui lian leh leilunga chhiatna dang a la thleng zui thei reng niin an sawi a, tun tuma thil thlenga thi pawh hi sorkarin mi 300 vel niin sawi mah se, mi 400 vel nia ngai pawh an awm a, Sierra Leone hi khawvela ram rethei ber pakhat a ni a, Red Cross chuan tun tuma thil thleng avang hian chenna tur in nei lo mi 3,000 chuang an awm niin a sawi.