Singapore bulah US indo lawng lian leh tuialhthei phur lawng insu

0
531
views

US indo lawng lian pakhat leh tuialhthei phur lawng chu Singapore bulah a insut avangin US lawng sipai 5 an hliam a, mi dang 10 an bo. BBC sawi danin, he US indo lawng, guided missile destroyer, USS John S McCain hi chawlh tuma Singapore khawchhak lam a pan laiin Liberia puanzar inzarna, tuialhthei phur lawng nen hian an insu a, he thil thlen thu hi a hmuna tûkin khawvar hma, dar 5:24 khan hriat a ni a, India ram sana-ah hian tûkin dar 2:51 kha a ni a, Strait of Singapore an tih chhak lam hreta thleng a ni. Singapore leh US hotute chuan, he indo lawng hi a chhe nual niin an sawi a, lawng pindan thenkhatah pawh tui a lut nasa hle niin an sawi. Tuialhthei phur lawng hi Alnic MC an ti a, lawng hma lam, tui chim chin atanga feet 23-ah a chhe ve nual na a, hliam an awm lo a, a tuialhthei phurh pawh a put lo niin an sawi a, he lawng, feet 600 a sei hi US indo lawng ai hian a sei hret zawk a ni. US Navy chuan an lawng sipai hliamte hi ngaihtuahawm an ni lo niin a sawi a, US Navy 7th Fleet hotute chuan, an lawng, USS John S McCain hi Singapore-a lawng chawlh hmunah dah fel a ni tawh tih an sawi bawk. Alnic MC-a thawk pakhat chuan, Taiwan atanga Singapore-a dah tur, tuialhthei ton 12,000 vel an phur niin a sawi a, USS John McCain hi US lawng rual lian ber, 7th Fleet an tih zinga mi a ni a, hemi hnuaia lawng pakhat chu June thla khan a chetsual avangin lawng sipai 7 an thi nghe nge a, kum khat kal ta chhung khan US indo lawng hi lawng dang nen vawi li a insu tawh niin an sawi bawk. USS John McCain hi US hruaitu langsar tak, Senator John McCain-a pa leh a pu hming chawia phuah a ni a, anni hi US lawng sipai hotu lu, Admiral ve ve an ni a, Senator John McCain-a chuan an nupa-in he lawnga thawkte him nan an tawngtai thu a sawi.