Sorkar laipuiah Minister 9 lak luh belh

0
291
views

Sorkar laipuiah nimin khan Minister 9 lak luh belh an ni a, Minister hna chanpual pawh nasa taka tihdanglam a ni. Nimina lak luh takte zingah hian sorkar hnathawk lian lo ni tawh 4 an tel a, kum 2019-a Lok Sabha inthlanpui lo awm tur ngaihtuah chunga ruahman nia ngaih a ni. Minister of State for Commerce, Pi Nirmala Sitharaman-i chu India ram chanchina hmeichhiate zinga Defence Minister hmasa ber a ni ta a, PM hlui, Indira Gandhi khan Defence hi enkawl tawh mah se, a hrana Defence Minister atana ruat zingah hmeichhia an la awm ngai lo a ni. Minister of State dang pathum pawh Cabinet rank-ah hlan kai an ni a, Piyush Goyal chu Railway Minister, thar a ni a, Petroleum Minister, Dharmendra Pradhan leh Minority Affairs Minister, Mukhtar Abbas Naqvi pawh Cabinet rank-ah hlan kai an ni. Heng Cabinet Minister 4 hi a hmain Minister of state, independent charge an ni a, Piyush Goyal-a hian Suresh Prabhu-a thlakin, Railway a enkawl ang a, Suresh Prabhu hian Defence Minister ni ta, Pi Sitharaman-i thlakin Commerce and Industry minister a ni ang. IFS officer hlui, ram palai chhuanawm tak ni thin, Hardeep Singh Puri chu Minister of State a ni ang a, Vice President ni ta, Venkaiah Naidu-a enkawl thin, Housing leh Urban Affairs Minister a ni ang. IAS officer hlui, Delhi Development Authority Commissioner ni tawh, KJ Alphons chu Minister of state (independent charge) a ni a, Tourism a enkawl dawn a ni. Union Home Secretary hlui, RK Singh Power and Renewable energy, enkawltu, Minister of state thar a ni ang. Mumbai Police Commissioner hlui, Satya Pal Singh chu Minister of state for Human Resource Development a ni a, anni bakah hian Bihar MP, Ahwini Kumar Choubey, Uttar Pradesh MP, Shiv Pratap Shukla, Madhya Pradesh MP, Virendra Kumar, Karnataka MP, Ananth Kumar Hegde leh Rajasthan MP, Gajendra Singh Shekhawat pawh Minister atan lak luh an ni.

Sitharaman, Pradhan, Goyal leh Naqvi hi Minister of State an nih chhunga hna an thawh that avanga mawhphurhna leh dinhmun sang zawk pek an ni a, heng zawng zawng hi PM, Narendra Modi leh BJP President, Amit Shah-a ruahman dun nia ngaih a ni a, Minister tharte hi Rashtrapati Bhavan-a inkhawm buatsaihah President Ram Nath Kovind-a’n rinawmna thu tiamtirin a la lut a ni.