Spain atanga inlakhran duh lo Catalonia mite pungkhawm

0
537
views

Spain ram bung, an ram sorkar laka zalenna puang, Catalonia khawpui, Barcelona-ah Spain laka zalenna puan duh lo mi eng emaw zat an pungkhawm a, Catalan tualchhung sorkar laka an lungawi lohna thu te leh, Spain ram thendarh an duh lohna thu te an au pui. Puan tawh angin Inrinni kalta khan Catalonia tualchhung sorkar chu Spain sorkar-in a thiah bakah, President rorelna-ah a puang zui a, Catalan President Carles Puigdemont leh Minister-te chu Spain sorkar thu an zawm lo anih chuan mi hnathawk tibuaia puha manah an vau bawk a, sorkar ukilte chuan helna chawk chhuaka puh an tum leh tum loh an la ngaihtuah mek tih an sawi bawk a ni.

Catalonia-in zalenna a puan duh loa pungkhawmte hi Catalan mi vek an ni a, an hruaitute chuan mi mtd khat vel an pungkhawm nia an insawi laiin, police te chuan mi 300,000 vel niin an sawi a, pungkhawm zinga a tam zawk chuan an tualchhung sorkar hruaitute hian dan an bawhchhia niin an sawi a, Spain sorkar-in kum 40 dawn heng mite hi a lo enliam mai mai tawh thu te leh englai mahin hetiang dinhmun hi an thlen an rin ngai loh thu te an sawi bawk a ni. Pungkhawm zingah hian European Parliament President hlui, Josep Borrell pawh a tel a, Spain sorkar-in tualchhung sorkar a thiah vang chauhin Catalonia-ah hian sum chungchanga chhiatrupna a la thleng lo mai mai niin a sawi bawk a ni.