Supreme Court-in mimal thil humhalhna chu ram mipuite dikna leh chanvo a ni tih a puang

0
624
views

Supreme Court-in mimal thil humhalhna chu ram danpui hnuaia ram mipuite dikna leh chanvo a ni tih a puang a, eptu pawlte chuan he thutlukna hi BJP kaihhruai sorkarin ram mipuite mimal zalenna chhuhsak a tumna a hnâwlna nia ngaiin, lawmawm an tih thu an sawi. Hemi chungchang, ngaihven hlawh tak ngaihtuahtu, Judge 9 awmna bench chuan mimal thil humhalhna hi ram danpui Article 21-in mimal zalenna chungchang a sawi leh, ram danpui bung thumnain zalenna a tih zingah a tel tih a sawi a ni. Puan tawh angin, Aadhaar chungchanga PIL thehluh behchhanin, Court sang berah hian Aadhaar hi mimal zalenna leh chanvo palzutna a ni em tih leh, mimal thil humhalhna hi mihring dikna leh chanvo-ah a tel leh tel loh chungchang ngaihtuah a ni a, sorkar laipui ukil, Additional Solicitor General, Tushar Mehta-a chuan Aadhaar hi mi chhui ruk emaw, enthlak nan emaw a hman theih loh niin a sawi a, sorkar laipuiin Aadhaar kalphung a duan danah hian thil tam tak a tel avangin sorkar tan pawh Aadhaar hman a nih dan hi hriat ngaihna a awm lo niin a sawi a ni. Aadhaar sawiseltute erawh chuan Aadhaar-ah hian kut zia, mit naute leh mimal chanchin kimchang taka chhinchhiah a nih avangin, ram mipuite chanchin leh thil pawimawh zawng zawng, sorkarin a hriatpui vek dawn niin an sawi a, tunah hian mi tld. khat chuang nih dan zawng zawng pawh sorkarin a hre tawh nia sawiin, hei hi mimal thuruk leh nihna, thup theih lohva hai lanna niin an sawi a ni.

Vawiina Supreme Court thuchhuak hian sum khawih chetna leh Aadhaar inzawmtirna hi mimal thila inrawlhna a nih leh nih loh erawh chu a sawi tel lova, hemi chungchang hi chu Supreme Court bench te zawk la ngaihtuah atan dah a ni a, mahse mi thiamte chuan, court thuchhuak hian Aadhaar chu a tihnghin avangin sorkarin a hmanna pawh a tlem deuh ngei dawn niin an sawi. Law Minister of State chuan Aadhar hi mihring inhriat chian nan leh, belh chian dawl taka thil tihna hmanrua a nih avangin, mihring dinhmun hriat chianna leh inbumna pumpelh nana hman a nih chuan, mimal chanvo palzutnaah ngaih theih a ni lo niin a sawi. Ukil lar tak, Prashant Bhushan pawhin, ram danpui hnuaia khua leh tuite chanvo bulpui pawh a chhan a zira khuahkhirh a tul chang a awm tih sawiin, Aadhaar hi inkhuahkhirhnaa ngaih tur a nih leh nih loh chu la ngaihtuah tur niin a sawi. May thla khan khatih laia Attorney General, Mukul Rohatgi chuan mimal zalenna leh chanvo, a pumpuia hman theih beiseina chu thawnthu ang chauh, a taka hman theih loh nia sawiin, kutzia leh mit naute thla lak pawh a duh lo chuan an hnial thei nia sawi chu a lo chhang lêt tawh bawk a ni. He thil pu luttute chuan, Aadhaar-a mimal chanchin chhinchhiah hi a tirah chuan a duh apiang tan chauha tih, khua leh tuite Identity Card chi khat anga sawi a ni a, a hnu-ah loh theih loh anga hman a ni leh ta niin an sawi a, sorkarin chhiah pekna, bank account hawnna, pawisa pukna, pawisa khawih chetna, pension hlawh chungchang leh mipui hamthatna thil dangah te a hmang ta zel niin an sawi.