UN hnuaia Human Rights hotuin Aung San Suu Kyi-i chu a tih tur ti lovah a puh

0
659
views

Myanmar rama Rohingya Muslim-te chunga hlei lenna thleng mek chungchangah UN hnuaia Human Rights lam hotu pakhat chuan Aung San Suu Kyi chu a tih tur ti lovah puhin, a dem thu a sawi a, Rohingya Muslim-te chunga thil thleng leh, thil awm dan pumpui hi a rapthlak hle tawh nia sawiin Yanghee Lee chuan, Suu Kyi hi a inrawlh thuai a tul tawh niin a sawi. UN ngaihdan chuan, he thil thleng avang hian Rohingya mi 87,000 velin Bangladesh an pan tawh a, Rohingya zinga hel hovin police hmun an beih avanga Myanmar sipaiten an beih let avanga he thil hi thleng nia sawi a ni. Rohingya ho hi ram nei lo, Muslim hnam chi khat an ni a, Myanmar rama lut an ni a, Myanmar-ah hian ram dang mi, dan kalha lut nia ngaih an nih avangin an dinhmun a chep hle nia sawi a ni. An chenna in 700 vel chu tun hnai khan hal nia hriat a ni a, an awmna hi tlawh mai mai theih a nih loh avangin, an dinhmun dik tak pawh hi hriat a harsa hle a ni. Nobel Peace Prize dawng tawh, Pakistan tleirawl, Malala Yousafzai pawhin he thil thleng chungchangah hian Pi Suu Kyi-i chu a inrawlh thuai a beisei thu a sawi a, Asia chhim chhak biala Muslim ramte pawhin Rohingya mite hi ngaihven an tul hle niin an sawi. Nimin khan Indonesia khawpui, Jakarta-a Myanmar embassy chu petrol bomb lian vak lo hmanga vawm a ni a, vawiin khan Indonesia Foreign Minister, Retno Marsudi chuan Myanmar sipai hotu chu thil awm dan a sawipui bawk a, Pi Suu Kyi pawh a hmu leh ang.