UNHRC hotupa-in Rohingya muslimte suat niin sawi

0
391
views

UN hnuaia mihring dikna leh chanvo humhalhtu pawl, United Nations Human Rights Council hotupa, Zeid Ra’ad al-Hussein-a’n Myanmar, Rakhine state-a Rohingya Muslim-te chunga thil thleng mek chu, chi leh chi insuatna niin a sawi. Al-Hussein chuan Myanmar sorkarin Rohingya mite a tih dan chu nunrawnthlak a tih thu leh, thla hmasaa hel \henkhatin sipai hmun an beih chhan letna atan chuan a uchuak hle nia a ngaih thu a sawi. Myanmar hian tun hnaiah ram hrang hrang sawisel a tawk nasa hle tawh a, Bangladesh Foreign Minister, AH Mahmood Ali pawhin nimin khan he thil thleng hi chi leh chi insuatna nia a ngaih thu a lo sawi tawh a, India pawhin Myanmar hi Rohingya mite kut thlak tawh lo tura a duh thu a lo sawi tawh bawk a ni. Puan tawh angin Rakhine-a buaina hi August ni 25-a Rohingya hel pawlte’n sipai hmun an beihna-a mi 12 an thah avanga hluar thar leh a ni a, he inbeihna-a mawhphurtu nia inchhal, Arakan Rakhine Salvation Army, ARSA-te chuan nimin khan October ni 9 hma chu silai lek leh tharum thawhna lam reng reng lakah an insum dawn tih an sawi a, ARSA hi nikum lawka din nia hriat a ni. Nikum October thla khan Myanmar sipaite hi beiin, ralthuam eng emawzat an lak bakah, anmahni umzuitu sipaite an lo lambun fo tawh \hin a, an din tirh chuan Harakah al-Yaqin tih hming invuahin, internet-ah Myanmar sipaiin Rohingya mite an sawisak dan video thlalakte pawh an lo theh darh tawh \hin a ni.