US-in North Korea missile kap thla dawn- US Defence Secretary

0
551
views

North Korea-in Guam, US, Japan leh South Korea lam hawia missile a kah chuan US-in a kap thla nghal dawn tih US Defence Secretary, James Mattis-a’n a sawi a, America sipaite chu North Korea thil tih chhang let turin an inpeih fel tawh tih a sawi bawk. Thuthar lakhawmtute hnenah Mattis-a hian ralthuam leh sipai chakna hman chu America-in duh lo hle mah se, a tul miau chuan hman mai pawh an hnial tawh lo niin a sawi a, US sipaite chu eng thil pawh hmachhawn turin an inpeih tawh niin a sawi. He Press conference-ah hian US Defence Secretary bakah Japan Foreign Minister, Taro Kono leh Defence Minister, Itsunori Onodera te pawh an tel a, Japan Defence Minister chuan an ramin beih a tawh chuan an ralthuam neih ang hmanga an beih let tur thu a sawi a, hetiang thil hi a thlen loh hlauh erawh chuan US nena an inlaichinna chu tun hma ang bawkin a tha chhunzawm zel dawn niin a sawi a, hetih rual hian North Korea avanga buaina hi muanawm taka chin fel an la duh reng tih sawiin, hemi atan hian theihtawp an chhuah zel tur thu a sawi bawk. Puan tawh angin, tun hnai khan Onodera hian North Korea missile chu Japan-in a duh chuan a kap thla thei niin Parliament-ah a sawi a, North Korea missile hi Japan tan a hlauhawm a nih chuan North Korea missile kah thlak phalna a nei thei dawn tih a sawi chu US nena an thawh dunna boruak tichhe thei niin mi thiamte chuan an sawi a ni.