US President, Donald Trump-an World Health Organization(WHO) hotu lehkha a thawn a, US in COVID-19 do nan a pawisa a thawh thin chu tihtawp hlenah a vau.

0
68
views

WHO hotu, Tedros Adhanom Ghebreyesus lehkha a thawnah hian ni 30 chhunga WHO in nasa taka hmasawnna a thawh loh chuan cheng maktaduai tam tak an hloh bakah US pawh member atangin a inhnukdawk ang tiin a vau a, nikum december atanga WHO in coronavirus leng a lo hmachhawn dan a sawisel bawk a ni.

Thawhtanni khan President Trump-a hian WHO chu China in a duh duh a, a thunun kual theih tiin a lo sawi tawh a ni.

Hrileng a hmachhawn dana dem hlawh tak President Trump hian China chu hrileng darh tirha thup tumah a puh a, WHO chu China mawhphurtu a ni tih pawm duh lohah a puh bawk a ni. China hian he puhna hi a lo pha fo tawh a, an ram chuan hrileng chungchang hriattirna te inhawng leh langtlang takin a hun takah an pe chhuak a ni a ti thung.

Khawvel pumpuiah mi maktaduai 4.8 in hri hi an kai tawh a, heng zinga maktaduai 1.5 hi US mi niin, US ah hian mi singkaw chuangin an thihpui tawh a ni.

Thawhtanni khan WHO in coronavirus hrileng an hmachhawn dan independent review an hawng a, WHO hotu Tedros chuan tlin lohna an nei tih pawmin phone call hmangin review a dawng thei reng tih a sawi.