Vice President 15-na atan M Venkaiah Naidu la lut

0
681
views

Pu M Venkaiah Naidu-a chu vawiin khan Vice President 15-na atan lak luh a ni. President Ramnath Kovind-a’n Rashtrapati Bhavan-a Durbar Hall-ah kum 68 mi, Pu Naidu-a hi rinawmna thu tiamtirin VP atan a la lut a, a lak luh inkhawmah hian PM Narendra Modi, VP hlui Hamid Ansari, Lok Sabha Speaker Sumitra Mahajan, PM hlui Manmohan Singh, Rajya Sabha-a eptu pawl hruaitu Ghulam Nabi Azad, BJP hruaitu hlun LK Advani leh sorkar mi pawimawh dangte an tel a ni. BJP President hlui, Pu Venkaiah Naidu-a hi kum 1949, July ni 1 khan Andhra Pradesh-a Nellore district-a khaw pakhat, Chavatapalem khuaah a lo pitng a, a pa hi lo neitu a ni a, chhungkaw harsa tak atanga sei lian a ni. College-a a kal lai atangin politics luh chilh tanin, RSS leh Hindu zirlai pawl, Akhil Bharatiya Vidyarthi Parishad-ah a inhmang nasa thin a, Visakhapatnam-a Andhra University College of Law atangin LL B a zir chhuak a ni. NDA-in VP candidate atana an thlan lai khan Information and Broadcasting Minister leh Housing and Urban Poverty Alleviation bakah Urban Development Minister a ni a, kum 1978 atanga kum 1983 inkar chhung khan Andhra Pradesh MLA a ni a, kum 1998 atanga kum 2016 thleng khan Karnataka atangin Rajya Sabha MP a ni bawk a, kum 2014 atanga kum 2016 inkar chhung khan Pu Naidu-a hian Parliamentary Affairs Minister hna a lo chelh tawh bawk a ni.

Pu M Venkaiah Naidu, Vice President a nih tak avang hian ram chhunga dinhmun pawimawh zual pali chu BJP mi hlirin an luah ta a, hei hi India ram chanchinah a hmasa ber a ni. Hengte hi RSS-a inhmang tawh vek an ni bawk a, Pu Naidu-a bakah hian President Ram Nath Kovind, PM, Narendra Modi leh Lok Sabha Speaker, Sumitra Mahajan chu BJP mi vek an ni a, Vice President Naidu hi Rajya Sabha Chairman a ni nghal bawk. BJP mi ni lote zingah mi pawimawh zual awm chhun chu Rajya Sabha Dy. Chairman, PJ Kurien chauh a ni ta a, ani hi Congress mi a ni a, kum 2012 August ni 21 khan thlan a ni a, ani pawh hi BJP-in hun remchang hmasa berah a thlak ngei rin a ni.