Puan tawh angin tun thla ni 14 khan BJP president Amit Shah-a roadshow huaihawtah buaina a chhuak a, Vidysagar college suasam a ni a, hetah hian Ishwar Chandra Vidyasagar-a lim tihchhiat a ni a, BJP party leh Trinamool Party-te chuan buaina tichhuaktuah an in puh tawn a, a tichhetu tak chhui turin West Bengal Chief Minister Mamata Banerjee chuan member 5 awmna committee din a nih thu a sawi a ni. He thubuaiah hian FIR 2 ziah luh a nih thu leh mi 35 man an nih thu a sawi bawk a ni. Committee hotu lu atan Home Secretary Alapan Bandyopadhyay chu ruat a ni a, Kolkatta Police Commissioner Anuj Sharma, Additional Commissioner of Police Jawed Shamin leh Vidyasagar College Principal Goutam Kundu te pawh an tel dawn a ni.
Varanasi-a a thusawinaah PM Modi chuan politics lama inhmuhthiam lohna avangin Kerela, Kashmir, Bengal leh Tripura-ah BJP mi leh sa engemawzat thah an nih tawh thu sawiin West Bengal-ah bik chuan tualthahna a la thleng chhunzawm zel niin a sawi a ni. Police te chuan Lok Sabha inthlan result puan hnua buaina chhuakah mi 2 thah an nih tawh thu an sawi a, kum 23 mi BJP hnathawk pakhat chu Zirtawpni zan khan kahhlum a ni a, BJP hnathawk dang pakhat chu Pathianni zan khan kahhlum a ni bawk a, BJP chuan TMC party te an mawhpuh a ni.
West Bengal Chief Minister Mamata Banerjee chuan tualthahna hi BJP party chhunga inhmuhthiam lohna vanga thleng a nih theih thu a sawi ve thung a, TMC hotu hlun pakhat chuan heng puhna te hi behchhan nei lo nia sawiin politics vanga buaina chhuakah BJP hnathawk te thah an nih loh thu leh an party mi te beih an nih zawk thu leh Panchayat inthlan pawh khan BJP te’n an party mi 30 bakah Trinamool MLA an that niin a sawi bawk a, Kakinda biala an party pisa te chu BJP MP Arjun Singh-a mi leh sa te’n an luah luih sak niin an sawi bawk a ni.
