Tripura Bru Relief Camp 6-a Mizoram mi awmte March thlaah hruai kir dawn

0
412
views

Tripura Bru Relief Camp 6-a Mizoram mi awmte chu kumin March thlaah hruaikir an ni dawn a, hemi atana inpuahchahna chu ngawrh taka kalpui mek a ni. Home Addl. Secretary, Pu Lalbiakzama chuan Bru-te hruaikir tura hmalaknaah harsatna dang a awm lo a nih chuan March thla chawhma lam atanga hruaikir tan tum a nih thu Zonet a hrilh a. Hetih rual hian, tun hma lama Bru-te hruaikir tura hmalakna chu tum engemawzat a lo hlawhchham tawh avangin Sorkar laipuia Home Affairs Ministry duh danin Bru hruaikir turte hi February chawlhkar khatna emaw kar hnihna emaw atanga endik hmasak phawt an ni dawn a. Hetah hian Bru hruaikir turte chu Mizoram mi dik tak an nih leh nih loh te, Mizorama an haw duh tak tak leh duh tak tak loh te a hmunah zawhfiah hmasak phawt an ni dawn a, hei hi a chhan chu sum tam tak senga anmahni hruaikirna tur ruahmanna chu a thlawn loh nana tih a nih thu a sawi.

Bru hruaikirte dahna tur District pathum- Mamit, Kolasib leh Lunglei District hotute pawhin kumin March thla atanga Bru-te hruaikir dan tur hi nikum December thla atang khan an lo rel tan tawh hlawm a ni. Tripura-a Mizoram Bru awmte hi kum 2016 November thla khan a hmunah kal chilha enfiah an lo ni tawh a, hemi tuma an chhinchhiah dan chuan Mizoram mi dik tak chu puitling 18,116 leh naupang 7,518 an ni a. Heng mite hi anmahni dahna tur khua theuhah Administrative Officer leh khawtlang hruaituten an lo buaipui dawn a ni.