1993 Mumbai bomb puaka thiam loh chantir 5 zinga pahnih thi turin ti, pahnih dang dam chhung tang dawn

Kum 1993-a Mumbai-a bomb engemawzat tihpuahnaa thiam loh chantir 5 zinga pahnih – Taher Merchant leh Feroze Khan chu thi tura tih an ni a, mi dang pahnih – Abu Salem leh Karimullah Khan chu dam chhung tang tura tih an ni a, mi dang pakhat, Riyaz Siddiqui chu kum 10 tang tura tih a ni. Kum 1993 March ni 12-a Mumbai-a bomb engemawzat tihpuah a nih avang khan mi 257 an thi a, mi dang 713 an hliam a ni. Kumin June ni 16-ah khan Special Terrorist and Disruptive Activities (Prevention) Act court chuan Salem, Merchant, Feroze leh Karimullah-a hi he pawi khawihna thlen nana phiar ruk, tualthah leh a firfiaka che-a puhna thubuaiah thiam loh a lo chantir tawh a, Siddiqui erawh pawh hi thiam loh chantir a ni na a, a inhnamhnawihna hi a tenau zawka ngaih a ni. CBI Special Public Prosecutor, Deepak Salvi chuan he thubuaiah hian Merchant, Feroze leh Karimullah hi tihhlum ni se a ti a, Salem leh Merchant-a hi an dam chhung, lung ina khung ni se a ti bawk a, Salem-a pawh hi tihhlum tura tih theih ni mah se, kum 2005-a Portugal atanga rawn thawn haw a nih khan, Lisbon court chuan thi tura a chungthu rel theih a ni lo, a lo ti tawh a, Salem-a chuan sorkar laipui intiam tawh angin, kum 25 aia rei tantir theih a ni lo niin a sawi bawk. He thila mawhphurtu bul ber pakhat, kum 60 mi, Mustafa Dossa chu court thuremna chhuah hmain a thi a, kum 11 vel tang tawh, Qayyum Shaikh, kum 64 mi chu a pawi khawih finfiahna tha tawk a awm loh avangin chhuah a ni bawk. Kum 1993-a Mumbai-a bomb engemawzat tihpuah thubuaia mi 7 chungchanga thuremna hi a hlawm hnihna a ni a, a hmasa zawk, mi 123 chungchang ngaihtuahna chu kum 2006 khan tihfel a ni tawh a, mi 100, thiam loh chantir an ni a, he thila mawhphur bera ngaih, tlanbo mek, Tiger Memon-a nau, Yakub Memon-a chu 2015 khan khaihlum a ni a, mi dang chu an tang mek a ni.
Kum 1993, March ni 12 khan Mumbai khawpui hmun hrang hrangah bomb 13 tihpuah a ni a, a puahna hmunte zingah hian Air India thlawhna company neitute hmun bakah, sumdawnna hmunpui, Bombay Stock Exchange leh puipunna hmun lar tak tak, Zaveri Bazar leh Juhu Centaur Hotel te pawh a tel a ni.