AAP-in Delhi Rajya Sabha seat pathum thlanna-a an candidate tur puang

0
517
views

Delhi-a rorel lai pawl, Aam Aadmi Party-in Delhi Rajya Sabha seat pathum hnawh khahna atana inthlanna tura an candidate turte an puang a, an hruaitu pakhat, MP nih beisei ve pakhat, Kumar Vishwas-a chu a tel loh avangin an hruaitu, Delhi CM, Arvind Kejriwal-a chu na takin a sawisel nghal a, thudik a sawi chhuah avang hrem nia a inngaih thu a sawi, Kumar Vishwas-a hi AAP dintu pathum zinga pakhat a ni a, CM, Arvind Kejriwal leh Deputy CM, Manish Sisodia nen AAP hi an din a, mahse Kejriwal-a hian amah paihthlak tuma phiar ru-ah a puh fo a ni. AAP hian an candidate atan hian mi langsar tak tak an be kual a, RBI Governor hlui, Raghuram Rajan pawh an dawr a, mahse mi 7 velin an hnar hnuah an hruaitu pakhat, Sanjay Singh, sumdawng Sushil Gupta leh chartered accountant, ND Gupta chu an candidate atan an thlang ta a ni. CM ina an \hutkhawmnaah an candidate turte hi puan an ni a, AAP MLA 56 vel an tel a, hei hi an party Political Affairs Committee-in a pawm a, Kumar Vishwas-a hi PAC member ni mah se, an \hutkhawmnaah hian a tel lo a ni. Tun thla ni 16-ah hian Delhi-a Rajya Sabha seat pathum hnawh khahna atana MLA-ten vote an thlak dawn a, AAP hian MLA 70-ah 67 an neih avangin, an candidate hi an tlin vek rin a ni.