AIADMK chhungkaw buaina-in ziaawm lam pan

0
662
views

AIADMK pawl pahnih, Tamil Nadu CM, Edappadi K Palaniswami-a kaihhruai leh, CM hlui, O Panneerselvam-a kaihhruaite chuan inzawm khawm leh an remti a, niminah khan hemi chungchang hi rei tak an sawiho hnuah, hei hi an titlu ta a ni. An thu tlukna hi puan thuai a nih rin a ni a, BJP President, Amit Shah-a’n he state a tlawh hma, Thawhtanni-ah khian puan mai a nih rin a ni a, BJP nawrna avangin pawl pahnih hian inzawm leh an remti nia hriat a ni bawk. Pu Panneerselvam erawh chuan an inbiakna hi la chhunzawm zel tur niin vawiin khan thuthar lakhawmtute a hrilh a, ni hnih khat chhunga thu tawp an siam tur thu a sawi a ni. AIADMK pawl pahnih hi an inzawm leh chuan, an party atangin Jayalalithaa thlak ngei tura inngai, Sasikala chu hnawhchhuah a nih rin a ni a, thla khat chhung atan hnawhchhuah phawt a ni ang a, chumi hnuah AIADMK General Body meeting neih a ni dawn niin Indian Express chanchinbu-in a sawi. An inzawm khawm leh hunah chuan Pu
Panneerselvam-a hi Tamil Nadu Deputy CM-ah dah a nih rin a ni a, hna chanpual pawimawha ngaih – Highways leh PWD enkawltir a nih bakah a hote zinga mite pawh party District Secretary leh, sorkar leh party-a hna pawimawh dang chelhtir an nih rin a ni bawk.