AIADMK hnuaia pawl pahnih inzawm leh ta

Tamil Nadu-a rorel lai, AIADMK hnuaia pawl hnih, state CM, E Palaniswami-a kaihhruai leh state CM hlui, O Panneerselvam-a kaihhruai chu vawiin khan an inzawm leh ta. Puan tawh thin angin, state CM hlui leh AIADMK hruaitu hlui, J Jayalalithaa-i thih hnu khan party hruaitu atan Pi Jaya-i tha chhang dawltu leh a thian tha, VK Sasikala-i chu thlan a ni a, hemi hnu hian Sasikala-i hian CM nih tumin a bei zui a, amaherawhchu khatih laia Pi Jaya-i aiawh tura ruat, O Panneerselvam-a chuan Sasikala-i thil tum hi a dodal avangin an party hi a phel ta a, hemi hnu hian Sasikala-i hi ei rukna thila thiam loh chantir a, Bengaluru lung ina khung a ni ta a, lung in a tan hma lawk khan Sasikala-i hian E Palaniswami-a chu CM atan a ruat bakah, a vahpa, TTV Dhinakaran-a chu party General Secretary atan a ruat a ni. CM hian O Panneerselvam-a pawl thil phut lian ber, an party atanga Sasikala-i hnawhchhuah chu a remti niin an sawi a, vawiin khan AIADMK pisa-ah pawl hnih hruaitute hi inchibaiin, inremna an siam a, an ruahman dan chuan, O Paneerselvam-a hi Deputy CM leh party coordinator a ni ang a, a hnung zuitu zinga mi pathumt chu Minister-a dah an nih rin a ni bawk.